US-in J&K-a zin lo turin an mite chah

US sorkar chuan India leh Pakistan tan travel advisory tichhuakin, America mite chu Jammu and Kashmir-a zin lo turin a chah.

State department-in thuchhuah a siamah hian J&K-ah chuan firfiaka chetna thleng ṭhin leh, tualchhung buaina a thlen fo avangin zin lo turin a chah a, hei bakah hian India-Pakistan border aṭanga km 10 huam chhungah kal turin a ti bawk.

Thuchhuahah hian, "India thuneitute chuan India rama pawkhawihna thleng ṭhin zingah pawngsual a tam chak hle tih pawh an sawi. Mipat hmeichhiat lam hawia pawikhawihna hi tourist site bakah hmun dangah pawh a thleng fo a ni," tiin firfiakte chuan engmah sawi lawk loin khualzinte hmun tlawh ṭhinte bakah, shopping mall leh sorkar hmunte an bei fo a ni, a ti.

State deparment chuan America mite chu Pakistan-a Balochistan province leh Khyber Pakhtunkhwa province-ah firfiaka chetna leh inrukbo thleng fo avangin zin lo turin a chah bawk. Pakistan-a firfiakte chuan pawikhawihna an thlen fo a, thliar bik pawh awm loin civil mi, tualchhung sipai leh police-te pawh an bei fo a ni, a ti. Tun hma lam pawhin Pakistan-a US palai leh palaite awmna hmunte pawh firfiakte chuan an lo bitum fo tawh thu a sawi.