Midang office/in a nawrh huaihawt lo turin Delhi CM hriattir

Delhi Chief Minister Arvind Kejriwal-a chuan sorkar lakah Delhi IAS officer nawrh huaihawtte tihtawp tir tura Lieutenant Governor Anil Baijal-a phutin, LG office-ah nimin thleng khan nawrh a la huaihawt chhunzawm zel. Hetih lai hian Delhi High Court chuan CM hi midang office/in ah nawrh a huaihawt ngawt thei lo ang tih a hrilh.

Delhi High Court chuan CM Kejriwal-a chu tunge hetianga nawrh huaihawt tura thuneihna pe tia zawtin, midang office leh inah lutin, nawrh a va huaihawt ngawt thei lo tih a hrilh a ni.

Kejriwal-a leh a cabinet minister ṭhenkhat chuan LG office-ah hian ni riat chhung nawrh huaihawtin an awm tawh a ni. Hei vang hian BJP MLA Vijender Gupta chu High Court-ah hian kalin, CM leh minister-te nawrh hi tihtawp tir turin a ngen a ni.

Hetihlai hian Delhi IAS officer-te chuan an nuar lo niin an sawi a, politics khelhna hmanruaah hman an tum zawk niin an sawi thung. File-te pawh dan pangngai anga an khawih vek thu sawiin, AAP sorkar thiltih dan chuan a tihlau niin an sawi. Mahse Delhi sorkar ukil chuan IAS officer-te hian minister-ten meeting an kohah an tel duh loh tih chu an pawm ngei tih an sawi chiang niin court-ah hian an hrilh.

CM Kejriwal-a ruala LG office-a chaw ngheia nawrh huaihawt, Delhi Health Minister Satyendar Jain chu kar khat dawn chaw a nghei tawh avangin a chau a, Pathianni zan khan LNJP Hospital-ah hruaiin a dinhmunte enfiah a ni. LNJP Medical Supirentendent JC Passey chaun minister taksa hi endik a nih hnuah Ketones level a sang a, blood sugar a hniam tih a sawi a, mahse a ngaihtuahawm lo niin a sawi. Damdawi-ina hruai a nih hnuah minister chuan Delhi mipuite tana a beih chhunzawm zel tur thu a twitter-ah a tarlang.

Pathianni tlai khan Delhi-a rorellai, Aam Aadmi Party (AAP) thlawptu mi tam takin Delhi sorkar buaina chinfel thuai a nih theih nana inrawlhna turin Prime Minister Narendra Modi-a office panin kawng an zawh. Police-te chuan kawngzawhte hi lo dangin, kawng zawh tura phalna pek an nih loh thu an sawi. AAP chuan kawngzawhnaah hian mi 45,000 vel an tel niin an sawi. Nimin khan AAP hruaitute chuan CM chenna inah meeting an nei bawk.

Kejriwal-a nawrh huaihawt hi Congress party tih loh eptu pawl hrang hrangte chuan an thlawp thu an sawi tawh a ni.