Trucker-ten ram pumah nawrh huaihawt

Ramchhunga diesel man sang zel leh third party insurance premium tihsan duh lohna lantirin nimin khan All India Confederation of Goods Vehicle Owners’ Association (AICGVO) chuan rampumah nawrh a huaihawt. Nawrh huaihawt vang hian truck maktaduai 50 chuang zet an ding a ni.

AICGVO hian April 23 khan sorkar laipui hnenah fuel man sang zel chu enfiah leh khuahkhirh dan ngaihtuah turin a ngen tawh a, an ngenna hi tihhlawhtlin a nih loh chuan tiam chin awm loa nawrh huaihawtah an vau a ni. Hetih lai hian nimina nawrh huaihawt hi All India Motor Transport Congress (AIMTC) chuan a zawm lo thung a, AITMC chuan July 20 aṭanga nawrh a tum ve thung a ni.

AICGVO President Channa Reddy chuan sorkar chuan khawvel huapa fuel man a sang tih chu chhuanlamah a hmang niin a sawi a, mahse India rama a man a san chhan chu international price vang ni loin, sorkar laipui leh state sorkar ten chhiah an lak san vang zawk a ni tih a sawi. Diesel man leh petroleum product-te chu Goods and Services Tax (GST) huam tel tir an phut a ni.