'Har Ghar Dastak' Campaign kaltlangin December chawlhkar khatnaah vaccine pek kim hman tum

India ramah ngawrh takin Covid vaccine pekchhuah chhunzawm zel a ni a, vaccine dose khatna la aiin a dose bikimin la an tam tawh zawk.

Union health minister Mansukh Mandaviya chuan 'Har Ghar Dastak' campaign kaltlangin December chawlhkar khatnaah ram chhunga vaccine la thei chin chu dose khatna pek kim hman an tum tih a sawi. Vaccine la thei chin chu la vek tura ngenin, vaccine pawh a tam zawk tih a sawi bawk.

'Har Ghar Dastak' Campaign hnuaia vaccine pek chhuah mekah, healthcare worker-te chu in tina kalin vaccine pek hna hi an thawk mek tih a sawi a, a bikin vaccine la thei chin zinga 50% la tling lo awmna district-te chu ngaih pawimawh zual an ni, a ti.

Minister chuan, "October 21 khan ram pumah vaccine dose vaibelchhe khat pek chhuak a ni tawh. Hemi hnu hian vaccine la la lote pek vek an nih theihna tura in tina dapchhuahna tur, 'Har Ghar Dastak' campaign chu prime minister chuan a hawng leh a ni," a ti.

Ramchhungah Nilaini thleng khan Covid-19 vaccine dose vbc 114 dawn semchhuah anih tawh thu union health ministry chuan a sawi.

Vaccine dose vaibelchhe 114 dawn hi hi session 1,16,73,459 kaltlanga pekchhuah an ni. Dose khatnaah 75,57,24,081 semchhuah tawh niin, dose hnihna 38,11,55,604 semchhuah a ni tawh. Dose khatna la (37,45,68,477) aiin dose bikima la (38,11,55,604) an tam tawh zawk a ni.

"He thil hi prime minister hmathlir ‘Jan-Bhagidari’ leh sorkar pum hmalakna, mipuite rinna leh sorkar an rintawkna vang te, ramchhung hmun tamtaka ‘Har Ghar Dastak’ campaign neih mek vanga thleng thei kan ni," tiin Mandaviya chuan a sawi.

Ministry of health and family welfare chuan a thlawna pek chhuah leh direct state procurement category kaltlanga state leh union territory-te hnena vaccine pek chhuah hi dose vaibelchhe 128 a tling tawh tih sawiin, state/UT-te hian vaccine hi hman tur tam tak an la kawl a ni, a ti.

Tuna vaccine pek chhuah kalpui mekah ni khatah dose nuai nga chuang an pek chhuak ṭhin a, hetianga pek chhuah chhunzawm zel theih a nih chuan kum 2022 April thlaah ram chhunga puitling chin chu vaccine dose bikima pek kim an ni thei ang. Kum 18 chunglamte dose bikima pe kim tur hian vaccine hi dose vaibelchhe 188 vel a la ngai dawn a ni.