Nov 29 aṭangin Parliament Winter Session nei dawn

Parliament Winter Session chu November 29 aṭangin neih ṭan a ni dawn a, December 23 thleng a awh ang.

Kum 2019 hnua Parliament session neih zinga session neih zawh tak, Monsoon Session kha rorel mumal lo an awm nasat ber ṭum a ni. Mahse thlasik ṭhutkhawm lo awm tura pawh hian session hmasaa an buaina bawk, ram chhunga loneitute nawrh huaihawt chungchang bawkin Parliament in hnih rorel a tihbuai leh hle rin a ni.

Sorkar laipuiin farm law pathum a siam thar duh lohna lantira loneituten nawrh an huaihawt hi session ṭan hma ni thum, November 26 hian a kum khatna a tling dawn a, hei vang hian eptute pawhin House-ah farm law duh lohna hi an lantir leh nasa hle dawn a ni. Hei bakah Pegasus spyware case chungchang pawh an rawn aupui leh ngei rin a ni bawk.

Eptute hian tun hnaia BJP sorkar thutlukna siam pahnih, ramri vengtu Border Security Force (BSF)-te thuneihna huam chin a tihzauh sak leh, November 14-a Enforcement Directorate (ED) leh Central Bereau of Investigation (CBI) director-te term, kum hnih aṭanga kum ngaa pawhsei theihna tur ordinance a tihchhuah chungchangah pawh sorkar laipui chu an beih ngei rin a ni bawk. Eptu party lian pahnih, Congress leh Trinamool Congess (TMC) chuan session neih hma lawka sorkarin ordinance a siam hi an lo sawisel nasa tawh hle a ni.