Amit Shah-an J&K-a BJP MLA te Delhi-ah ko ; BJP-in J&K sorkar thlawpna hnukdawk

Jammu and Kashmir-a People's Democratic Party (PDP) nena ṭangrual sorkar siamtu, Bharatiya Janata Party (BJP) chuan nimin khan PDP kaihhruai sorkar a thlawpna a hnukdawk.

Jammu and Kashmir-a ṭangrual sorkar siamtu, PDP leh BJP inkar boruak hi tunhnaiah a ṭha vak lo nia sawi a ni a, hei vang hian nimin khan BJP national president Amit Shah chuan J&K-a BJP MLA-te chu Delhi-ah koin meeting a neihpui a ni. Meeting an neih hnuah BJP chuan PDP sokar an thlawpna an hnukdawk tih hi a puang ta a ni.

Nimina Delhi-a BJP headquarters-a meeting-ah hian J&K-a party MLA leh state unit hruaitute an tel a, state chhung politics dinhmun bakah security chungchangte pawh an sawiho a ni.

Sorkar laipui chuan Jammu and Kashmir-ah hian Ramzan thla pualin firfiakte laka beihpui thlak titawpin inkahhai a puang a, thla khat dawn inkahhai a puan hnuah a titawp a ni. Inkahhai puan a tihtawp vang hian sorkar laipui chungah PDP a lungawi lo hle a ni.

Delhi-a meeting neih zawh hnua press conference an neihah, BJP vice president leh general secretary Ram Madhav chuan, " BJP tan Jammu and Kashmir-a ṭangrual sorkara tel chhunzawm zel theih a ni ta lo a ni", tiin a sawi. PDP sorkar thlawpna hnuhdawk chu J&K-a party MLA leh minister te bakah, party hruaitute pawhin an pawm vek niin a sawi.

Madhav chuan kum 2014 assembly inthlanah khan J&K-a boruak ṭha leh ngelnghet a awm theihna atan BJP chuan PDP thlawp chu a remti niin a sawi. J&K-a boruak muanawm a awm a, hmasawnna thlen chu an duh ber leh, PDP an thawhpuina chhan a nih thu a sawi bawk.

Sorkar thlawpna hnuhdawh an tum tak avangin BJP minister-te chuan Chief Minister Mehbooba Mufti-i hnenah banna lehkha an thawn nghal a, MLA-te pawhin Governor hnenah banna an thehlut ve thuai dawn bawk niin Madhav chuan a sawi. Madhav chuan J&K chu Governor rule hnuaia dah an duh thu a sawi nghal bawk a ni.

BJP-in ṭangrual sorkar an thlawpna an hnuhdawh thu an puan hnuah, nimin vek khan Chief Minister Mehbooba Mufti-i chuan Governor NN Vohra hnenah banna a thehlut ve nghal a ni. Banna a thehluh hnu hian Mufti-i chuan PDP emergency meeting a ko nghal bawk. BJP tel lo chuan PDP hian sorkar siam turin MLA a ngah tawk lo a ni.

Congress hruaitu Ghulam Nabi Azad chuan J&K politics vir vel dan chuan a ṭhawng hle tih a sawi a, Congress chuan PDP chu thawhpui a tum lo niin a sawi nghal bawk.