Nirav Modi-an a passport sut hnuah UK vawi nga a tlawh

Central Bureau of Investigation (CBI) official-te chuan Punjab National Bank (PNB) sum tam tham tak tihchingpenna mawhphurtu bera puh, Nirav Modi-a chu sorkarin a passport sut sak hnuah pawh US, UK, Hong Kong leh France-ahte a zin thei tho niin a sawi.

PNB-a cheng vaibelchhe 13,000 chuang zet tihchingpennaa mawhphurtua puh, lunghlua sumdawng lian Nirav Modi-a leh a pu, Mehul Choksi-te chu thubuai siamsak an ni. Mahse thubuai siamsak an nih hma hian Modi leh a pu hi rampawn lamah an tlanchhe hman a ni. An awmna chin hriat theih nan hian CBI chuan February 15 khan Interpol kaltlangin hriattirna a tichhuak a ni.

CBI thupuangtu Abhishek Dayal chuan, "External ministry-in Modi-a passport hi a sut hnuah, a awmna chin hriat theihna tura hriattrirna tichhuah a ni. Hei hi February 24 khan interpol member ram hrang hrang hnenah pek a ni", a ti. Interpol member ram 190 hnenah hriattirna hi pek niin, Modi-a tlanchhiatna ram nia rin paruk–US, UK, France, Belgium, Singapore leh UAE-te chu a hranpaa sawipui an ni bawk tih a sawi. Heng ram parukte hi Modi-a awmna leh a chetvel dan information pe tura an ngen thu a sawi.

Hei bakah hian ministry of external affairs chuan a hranpain Hong Kong hnenah Modi-a man tur leh India rama thawn tura ngenna a thawn bawk a ni.

UK chauhin Modi-a kal leh chhuah dan chungchanga a thil hriatte hi agency hnenah hian a thawn kir a ni.

UK-in June 5-a CBI hnenah a hriattirah, February 10 khan Nirav Modi hi New York aṭangin London-a Heathrow airport a thleng a, February 15 khan Hong Kong aṭangin Heathrow hi a thleng leh a, March 15 khan Heathrow aṭangin Hong Kong a pan a, March 28 khan New York aṭangin London a thleng leh a, March 31-ah London aṭangin Paris a pan leh niin a tarlang. Heng a zinkualnaah hian passport number Z 1781888 a hmang nia a lan thu a sawi bawk.