UP-ah bawng talha puh mi pakhat sawisa hlum

Uttar Pradesh-a Hapur district-a Pilakhua-ah Thawhṭanni zan khan mi pakhat, bawng talha puh chu mipui thinrimin an sawisa hlum a, midang pakhatin hliam na tak a tuar bawk.

Mipui thinrimin an sawisak hlum hi kum 45 mi, Qasim a ni a, bawng a talh nia thu a than hnuah tualchhung mite chu a farm-ah kalkhawmin hna thawka lo awm Qasim leh Sameyddin te chu an sawisa zui ta a ni. He thil thleng an hriat hian police-te an kal nghal a, Qasim leh Sameyddin-te chu damdawi-inah hruaiin, Qasim hi a hliam tuar loin a thi a, Sameyddin hian hliam na tak a tuar a ni. 

Police-te chuan bawng an talh nia thu thang awm chu thu dik lo a nih thu sawiin, a sawisatu zinga puh mi panga an man a ni.