Israel-in minister hlui enthlatuah puh

Israel chuan an cabinet minister hlui, Gonen Segev chu Iran tana enthlatuah a puh.

Israel internal security service Shin Bewt chuan medical doctor, kum 1990 chhoa energy minister lo ni tawh, Gonen Segev hi Nigeria rama a awm laiin Iranian intelligence agent-ten an chhawr niin a sawi. May thla khan Equatorial Guinea-ah man a ni a, Israel police-te ngenna angin Israel ramah thawn a ni.

Kum 62 mi, Segev hi kum 2005 khan ruihhlo tawlhruk leh diplomatic passport lem siama puhna thubuaiah kum nga tang tura hrem a ni tawh bawk. A medical licence pawh hlihsak a ni a, mahse kum 2007 khan jail aṭanga chhuah niin Nigeria ramah a pem a, a doctor hna pawh thawh chhunzawm phalsak a ni.

Shin Bet chuan thuchhuah siamin, Segev hi thla hmasaa Israel-a thawn kir a nih veleh man nghal a nih thu a sawi. Thu zawhfiah niin, Iran intelligence agent-te nena an inbiakpawh dan leh, an hnathawhna kawnga a puih dante an zawhfiah an ni.

Thu zawhfiahnaah hian investigator-te chuan Segev hian kum 2012 kha Nigeria-a Iran embassy-a thawktute a bepawp a, amah ruaitute hmu turin Iran pawh ṭum hnih a tlawh tih an hrechhuak niin Shin Bet chuan a tarlang. Segev hian ramdangah pawh amah ruaitute hi hmuin, coded message hmangin thurukte a hrilh ṭhin niin a sawi.

Shin Bet chuan Segev hian amah chhawrtute hnenah Israel energy sector kaihhnawih thuruk pawimawhte leh Israel-a security site chungchangte a hrilh niin an sawi. Hei bakak hian security sector lama inhnamhnawih Israel mi ṭhenkhat chu amah chhawrtute chu sumdawng anga lantirin a inbiak tir niin a sawi bawk.