PM Modi-a'n Farm Law 3 sût a ni dawn tih a puang
Prime minister Narendra Modi chuan nimin zinga Guru Nanak piancham, Guru Nanak Jayanti puala ram mipuite hnena thuchah a sawiah, ram chhunga loneituten an dodal mek, sawisel hlawh tak Farm Law pathum siam tharte chu sût a ni dawn tih a puang.
Prime Minister chuan, "Ram mipuite chungah thupha ka chawi a, hemi rual hian he dan siam tharah hian kan unau loneitute hnena a nihna ang taka kan hrilhfiah theih loh a lo awm a ni maithei a ni. Mahse tumah inmawhpuh hun a ni lo. Heng dan pathumte hi sut a ni leh vek dawn tih ram mipuite ka hrilh duh a ni," a ti.
Dan siam thar sutna tur hi Parliament Winter session lo awm turah tihfel a ni dawn tih PM chuan a sawi nghal bawk. Session hi November 29 aṭangin neih ṭan a ni ang. Farm law duh loa kum khat dawn nawrh lo huaihawt tawh, loneitute pawh an nawrh titawp a, an chhungte bula kira hma lam pan tur bul ṭan thar leh turin Modi chuan a ngen nghal bawk a ni.
Modi chuan an dan siam hi ram chhunga loneitu tenau zawkte dinhmun siamṭhatna tura an duan a nih thu a sawi leh a, "Ka thil lo tih tawhte hi loneitute puala ti ka ni. Tuna ka tih hi kan ram tana ti ka ni," a ti.
Sorkar laipuiin nikum September thlaa Farm Law pathum - Farmers’ Produce Trade and Commerce (Promotion and Facilitation) Act, 2020, Farmers (Empowerment and Protection) Agreement of Price Assurance, Farm Services Act, 2020, leh Essential Commodities (Amendment) Act, 2020 a siamte duh lohna lantirin, nikum November 26 aṭang khan ram chhung hmun hrang hrang aṭanga loneitu kalkhawmte chuan Delhi border-ah lungawi lohna an lantir a ni. Tun thlengin Delhi border hmun thumah loneitu eng emaw zat chuan heng dan duh lohna hi an la lantir chhunzawm zel a ni.
Loneitute leh sorkar aiawhte hi Farm Law chungchangah hian ṭum 11 zet an inbe hman a, mahse inremna an siam thei lo a ni. Sorkar lam hian heng dan siam tharte hi sut kher lo a, loneitute nena sawihoa siamṭhat an rawt a, mahse hei hi loneitu lam chuan duh loin, sut vek an phut.
Eptuten sorkar thutlukna siam an sawi zui
Eptu party hrang hrangte chuan sorkar laipuiin Farm Law sut a tum chu lawmawm an tih thu an sawi rualin, he thil hi nakkuma Punjab, Uttar Pradesh, Uttarakhand, Goa leh Manipur assembly inthlan awm tur thlirin, politics thil vanga ti nia a lan thu an sawi.
Shiv Sena hruaitu leh MP, Sanjay Raut chuan, "Sorkar laipui chuan politics vangin farm law-te hi sut a tum a, mahse a lawmawm tho a ni. Punjab leh Uttar Pradesh-ah chak loh a hlauh avangin hengte hi a ti ta a ni. Loneitu lamin sorkar an nawr reng a, kum sarih chhunga a vawi khatna turin Prime Minister chuan ram mipuite au aw chu a hre ve ta a ni. Sorkar hian he thutlukna hi lo siam hma se chuan loneitu nunna eng emaw zat a chhan hman ang," a ti.
Uttar Pradesh chief minister hlui, Samajwadi Party hotu Akhilesh Yadav pawhin BJP sorkar chu rin ngam a la harsa tih sawiin, nakkuma assembly inthlan neih zawhah dante hi siam thar leh mai hlauthawnna a la awm tih a sawi. Yadav chuan BJP chuan loneitute chu a ngai pawimawh lo a, vote an hmuh theihna tur a ngai pawimawh zawk a ni,tiin a sawi.
Congress hruaitu, Priyanka Gandhi Vadra pawhin inthlan lo awm tur vang chauhin Prime Minister chuan a thutlukna siam tawh chu a sut a ni tih a sawi ve bawk. Inthlan a hnai tawh a, survey neihahte BJP an che ṭha tawk lo a, hei vang hian vote zawnna turin hetianga thil an ti ta mai niah a puh. Rahul Gandhi pawhin farm law vanga loneitute tawrhna tam tak an thlen avangin ngaihdam dil turin PM Modi a phut bawk.