India ramah Covid hri kai mek zat tlahniam zel

India ramah Ningani khan Covid-19 hri kai thar mi 11,106 an awm belh leh. Ram chhunga hri hmuhchhuah tawh chu mi 3,44,89,623 an tling tawh a, hri kai mek hi 1,26,620 in an tlahniam thung tih Union health ministry data chuan nimin khan a tarlang.

Covid-19 vanga thi 459 awm thar nen, thihpui zat hi 4,65,082 an tling tawh a ni.

Ni 42 chhung nitin hri kai thar mi 20,000 hnuailamah a awm tawh a, ni 145 chhung a zawnin nitina hri kai 50,000 hnuailamah a awm tawh bawk.

Hri kai mek, active case chu 1,26,620 a tlahniamin, hri kai tawh zat aṭanga 0.37% niin, March 2020 hnua a hniam ber ṭum a ni. Ramchhunga Covid-19 kai dama puan, recovery rate chu 98.28% niin, March 2020 hnua a san ber ṭum a nih thu health ministry chuan a sawi.

Darkar 24 chhungin Covid-19 kai mek 2,142 in a tlahniam.

Nitina hri kai thar zat, daily positivity rate chu 0.98% a ni. Ni 46 chhung 2% hnuai lamah a awm tawh a ni.

Kartina hri kai zat, weekly positivity rate chu 0.92% a ni. Health ministry tarlan danin, ni 56 chhung 2% hnuai lamah a awm tawh a ni.

Hri kai dama puan mi 3,38,97,921 an tling tawh a, hri kai tawh aṭanga thihpui, fatality rate chu 1.35% a ni.

Ramchhunga Covid-19 vaccine semchhuah kalpui a nih aṭangin dose vaibelchhe 115.23 chuang semchhuah a ni tawh bawk.