Varun Gandhi-a'n farm law sút har vangin sorkar laipui sawisel ; Loneitu thi chhungte zángnadawmna atan Rs vbc 1 pe turin phut
Bharatiya Janata Party (BJP) MP Varun Gandhi chuan farm law pathum sut a nih dawn avangin prime minister Narendra Modi chungah lawmthu a sawi a, hemi rual hian he thutlukna hi lo siam hma se chuan loneitu tam takin nunna an chan lo ang, a ti.
Prime Minister hnena online letter a thawnah, BJP MP Gandhi chuan mininum support prices (MSP) chungchanga loneitute ngenna pawmsak a pawimawhzia a sawi bawk. "He an thil phut chungchangah hian resoltuion siam a nih loh chuan he movement hi a tawp mai dawn lo a, lungawi lohna leh thinrimna nasa zawk a chawk tho thei a, kawng dangin buaina lian tham tak a la chhuak thei a ni," tiin a sawi.
Loneituten hun rei tak farm law duh lohna lantira nawrh an huaihawt chhungin Varun Gandhi hian loneitute thlawp lam leh, BJP kaihhruai sorkar laipui policy sawisel zawngin thu pawh a lo sawi fo tawh a ni. Farm law duh lohna lantir chhunga loneitu nunna chan chhungte chu zangnadawmna, cheng vaibelchhe khat pe turin sorkar a phut a, hei bakah hian politics thila loneitute laka FIR dik lo thehluh zawng zawng pawh sut leh vek turin a phut bawk.
Gandhi chuan tun hnaia Uttar Pradesh-a Lakhimpur Kheri-a loneitute beihna thleng chungchang pawh sawilangin, he thil thlenga inhnamhnawih union minister lakah pawh action la ngei turin a phut thu a sawilang bawk a ni. Lakhimpur-a loneitute chunga thil thleng chuan India ram democracy hmel a tihem hle tih sawiin, Uttar Pradesh chief minister Yogi Adityanaath hnenah pawh pawikhawihna thlenga inhnamhnawihte chu an vaiin tualthah thubuai siamsak turin a ngen bawk a ni.
Telangana sorkarin zángnadawmna Rs nuai 3 pe dawn
Telangana sorkar chuan kar liamta Inrinni khan sorkar laipuiin farm law a siamte dodal a, Delhi border-a lungawi lohna lantir chhunga loneitu 750 thi chhungte chu zangnadawmna, cheng nuai thum ṭheuh a pe dawn tih a puang.
Chief minister K Chandrasekhar Rao chuan zangnadawmna pekna tur hian state sorkar chuan cheng vaibelchhe 22.5 a séng dawn tih a sawi a, loneitu pawl hruaitute hnenah nawrh huaihawt chhunga loneitu thite chanchin kimchang chu thawn turin a ngen a ni.
CM Rao chuan sorkar laipui chu loneitu thi chhungte chu cheng nuai 25 ṭheuh pe tur leh, loneitu leh anmahni thlawptute laka thubuai a siamsakte sut leh vek tura phutin, Parliament session lo awm turah minimum support price (MSP) dan ruahman ngei turin a phut bawk.