J&K-ah Governor's rule puang

Jammu and Kashmir-a People's Democratic Party (PDP) nena ṭangrual sorkar siamtu, Bharatiya Janata Party (BJP) in sorkar thlawpna an hnuhdawh hnuah, PDP hotu Mehbooba Mufti-i chuan chief minister a nihna aṭanga banna a thehlut ve nghal a, hei vang hian nimin khan J&K chu Governor's rule hnuaiah dah a ni.

Thawhlehni khan J&K-a BJP MLA-te chuan Delhi-a an party headquarters-ah party president Amit Shah leh hruaitu dangte nen meeting an nei a, meeting zawh hnu hian PDP kaihhruai ṭangrual sorkar an thlawpna an hnuhdawh thu an puang a ni. Hemi hnu hian PDP chuan sorkar siam tura member a ngah tawk loh avangin Mufti-i leh a minister-te chuan Governor NN Vohra hnenah banna an thehlut zui ve nghal a ni.

Governor Vohra chuan President Ram Nath Kovind hnenah an state dinhmun hi thlen nghalin, Constitution section 92 hnuaiah J&K-a Governor's rule puang tura rawtna a siam a, hei hi nimin zing khan President Kovind chuan a pawmpui ta a ni.

Ramchhunga state dang zawngah chuan state sorkar a buai chuan President's rule puan a ni ṭhin a, mahse J&K bikah chuan Governor's rule hman a ni thung ṭhin. J&K Constitution section 92 hnuaiah President pawmpuinain Governor's rule hi thla ruk atan puan theih a ni. India ram danpui chuan J&K hi special status pein, state zingah a hranpaa Constitution nei awmchhun a ni bawk.

J&K-a ṭangrual sorkar siamtu, PDP leh BJP te hi sorkar laipuiin J&K-a inkahhai a puan pawhsei duh leh duh loh chungchangah an inhrethiam lo nia sawi a ni.

Sorkar laipui chuan Ramzan thla puala inkahhai a puan hi pawtsei duh loin sipaiten beihpui an thlak chhunzawm nghal a, hei hi PDP chuan an duh lo a ni. Hei bakah hian kum thum PDP-BJP sorkar a din chhungin Hizb-ul-Mujahideen firfiak Burhan Wani thah a nih hnuah security force-te hma lak dan te, Kathua-a hmeichhe naupang kum riat mi pawngsual rawn leh thah a nih chungchangah te, security force-te lunga tawng ṭhinte laka policy siam danahte party pahnihte ngaihdan hi a inang lo fo bawk.

Tun hi kum 40 kalta chhunga J&K-a Governor's rule puan a nih ṭum riatna a ni tawh a, Governor atana Vohra dah a nih hnua a ṭum lina a ni bawk. Kum 2008-a PDP-in Congress-PDP ṭangrual sorkar thlawpna a hnuhdawh khan ni 174 chhung Govenor's rule hnuaiah dah a lo ni tawh bawk.

Kum 2014 December thlaa assembly inthlana sorkar siam thei an awm loh avang leh, eng party mahin sorkar siam tura thawhho an tum loh avangin Governor's rule puan a ni leh bawk. Kum 2016, January 8 khan Mufti Sayeed a thih avanga PDP leh BJP-ten ṭangrual sorkar siam hun tur an tihkhawtlai avangin Governor's rule hnuaiah dah a ni a, hemi kum April 4-a chief minister atan Mehbooba Mufti-i lakluh a nih hnuah tihtawp a ni.