Omar-an J&K-a inthlan ṭhat buatsaih a phut

Jammu and Kashmir-ah ṭangrual sorkar siamtu, People's Democratic Party (PDP) leh Bharatiya Janata Party (BJP) ten thawhdunna an tihtawp tak vangin Nilaini aṭang khan J&K chu Governor's rule hnuaiah dah a ni.

J&K Chief minister hlui leh National Conference (NC) hruiatu Omar Abdullah chuan sorkar siam thei an awm tak loh avangin Legislative Assembly chu ṭhiah nghal a, inthlan ṭhat buatsaih thuai turin a phut.

PDP nena ṭangrual sorkar siamtu, BJP chu Thawhlehni khan kum thum chhung ṭangrual sorkar an lo siam tawh aṭangin a inhnukdawk a, hemi hnu hian PDP chuan party mala sorkarna a siam theih loh avangin Mehbooba Mufti-i chuan Governor NN Vohra hnenah chief minister a nihna aṭanga banna a thehlut a, a rual hian a minister-te pawhin banna an thehlut nghal a ni. CM leh minister-ten banna an thehluh hnuah Governor chuan President Ram Nath Kovind-a hnenah an state politics dinhmun report-in Governor's rule puang turin a rawt a, Nilaini zing khan President chuan Governor's rule hi a puang ta a ni.

BJP hruaitu leh Deputy Chief Minister Kavinder Gupta chuan an party-in PDP thlawpna a hnuhdawh hnuah hma lak dan zel dan an ngaihuah mek tih a sawi. Gupta chuan sorkar thar chu a din nghal mai theih a rin loh thu a sawi a, mahse hemi rual hian hma an la mek tih a sawi.

Hei hi chhangin, Omar Abdullah chuan BJP chuan sorkar thar siam turin party dangte thawhhonna tihchhiat a tum leh mek a ni, a ti. Hei vang hian Assembly chu ṭhiat a, inthlan ṭhat buatsaih thuai a ngai niin a sawi a ni.

Governor NN Vohra chuan Governor's rule puan a nih hnuah Nilaini vek khan civil administration leh police hotute chu Srinagar-a Civil Secretariat-ah meeting a neihpui nghal. Governor chuan chief secretary BB Vyas leh IPS office pension tawh Vijay Kumar-te chu advisor atan a ruat nghal a ni. Vohra chuan June 19-a PDP-BJP sorkarin thupek a lo tihchhuah tawhte chu a titawp rih a, secretary-te hnenah Prime Minister Development Programme bakah central flagship scheme hrang hranga hmasawn dan report thehlut turin a hriattir. Hei bakah hian IB leh LoC bula thingtlang khaw hrang hrangah bunker sak mek chungchang te, ramri-a Pakistan sipaite silai hmehpuah tuartute hnenan zángnadawmna pek dan te, panchayat leh municipal eleciton neih tura atana inbuatsaih dante report thehlut turin a ti bawk.