Delhi sorkarin hna thawk ṭan thei ta

Delhi sorkar leh IAS officer-te inhmuhthiam loh avanga thla li dawn hna thawk mumal thei loa a awm hnuah Nilaini aṭang khan Delhi sorkar chuan hna a thawk leh ṭan thei a, Secretariat-ah group hrang hrangten meeting 20 vel an nei hman a ni.

Kumin February thlaa Chief Minister Arvind Kejriwal-a ina meeting neihnaah Chief Secretary Anshu Prakash-an rorellai, Aam Aadmi Party (AAP) MLA-te kutthlak leh ankhum a tawk nia a sawi avangin IAS officer-te chu minister-te meeting kohah an tel duh loh bakah, telephone-a biak pawh an chhang duh lo nia sawi a ni. Hetianga IAS officer-te nawrh huaihawt hian sorkar hmalakna hrang hrang a nghawng buai hle a, hna thawk mumal thei loin hun rei tak a awm tawh a ni. Hetihlai hian Lieutenant Governor Anil Baijal chuan officer-te lam hi a ṭan nia sawi a ni.

CM Kejriwal-a leh a minister ṭhenkhat chuan IAS officer-te nawrh titawp tura nawr tura LG phutin, LG office-ah hian ni kua zet nawrh an huaihawt bawk a, mahse Thawhlehni khan an nawrh huaihawt hi an titawp a ni.

Kejriwal-a chu nawrh a tihtawp hnuah nimin khan cabinet meeting-ah a tel a, hemi hnu hian ni 10 chhung atan chawlh lain Bengaluru lamah in enkawl turin a kal nghal a ni. Kejriwal-a hi zunthlum nei a nih avangin nawrh a huaihawt vang hian hriselna dinhmun pawh a ṭhat loh phah hle nia sawi a ni a, khawsik sang tak a neih bakah a blood sugar level pawh a sang hle niin deputy chief minister Manish Sisodia chuan a sawi.