PM Office-in Kerala CM ngenna hnawl

Prime Minister Office chuan nimina Kerala Chief Minister leh Left leader Pinarayi Vijayan-an PM hmuh a dilna chu a hnawlsak leh a, hei hi a zawna Kerala CM ngenna a hnawlsak ṭum li-na a ni tawh.

CM Vijayana-a hi Delhi-ah CPI(M) central committee meeting hmang turin a kal a, nimin khan PM hi hmuh tumin dilna a siam a ni. Mahse PMO chuan CM Vijayan leh all-party aiawhten PM hmuh an dilna hi a lo hnawlsak a ni. All-party aiawte hian Kerala tana ration pek chungchanga thil fel tawk lo awmte sawipui tura PM hmuh hi an tum a ni.

PMO chuan an ngenna siam hi chhangin, Kerala CM chuan a ṭul a nih chuan Food and Public Distribution Minister, Ram Vilas Paswan a hmu thei zawk ang tih a lo hrilh a ni. Kar hmasa khan Vijayan hian PM hmuh hi a lo dil tawh bawk a, hei pawh hi a hnawlsak a lo ni tawh a ni.

Kum 2017, March 20 khan Chief Minister Office hian an state budget chungchang sawipui turin PM hmuh hi a dil a, hei hi hnawlsak a ni. Kum 2016, November 24-a CM Vijayan-an pawisa note tih thih chungchang sawipui tura PM Modi hmuh a dilna pawh hnawl a ni tawh bawk.

Delhi Chief Minister Arvind Kerjiwal-an Delhi IAS officer nawrh huaihawtte tihtawp tir tura phuta Lieutenant Governor Anil Baijal-a office-a nawrh a huaihawtna thlawptu zingah Vijayan hi a tel a, CM Kejriwal-a nupui Sunita-i hmutu non-NDA chief minister pali zingah pawh a tel a ni. Vijayan-a hian Delhi sorkar leh IAS officer-te inkara harsatna awmte chingfel tura inrawlh turin PM Modi hi lehkha a thawn a ni.