Loan ngaihdam leh a thlawna power pek hi buaina chinfelna a ni lo -Naidu

Vice President Venkaiah Naidu chuan loneitute loan ba ngaihdam sak leh a thlawna power pek ṭhin chu an harsatna chinfelna tluantling a ni lo tih a sawi a, thlai hlawk zawka an thar theih dan tur zirtir a ngai a ni, a ti.

Pune-a ni hnih awh, National Consultation on Making Agriculture Sustainable and Profitable a hawnnaah Vice Preident chuan thu sawiin, loneituten an thlai thar aṭanga an sum lakluh a leta tihpun a nih theihna turin ruahmanna fel tak nena hma lak a ngai tih a sawi. He hunah hian Maharashtra Chief Minister Devendra Fadnavis, Union Agriculture Minister hlui Sharad Pawar bakah agricultural scientist Prof MS Swaminathan te pawh an tel.

Agriculture chu rintlak, hlawk zawk leh loneitute dinhmun chawikanna tura kenkawh a ngaih thu sawiin, Naidu chuan policy siamna kawngah fel tawk lo awmte pawh enfiah a, siamṭhat a ngaih thu a sawi. "Kan policy-te chu loneitute thlawp lam niin, agriculture lam duhsak bik an ngai a ni", a ti. 4 Is–Irrigation, Infrastructure, Invesment leh Insurance sector-te chu farm sector tihhmasawnna atana tihchak an ngai tih a sawi.