J&K-ah firfiak pahnih kaphlum

Jammu and Kashmir-a Anantnag district-a Srigufwara area-ah nimin khan security force-ten firfiak pahnih an kaphlum. Firfiakte nena inbeihnaah hian police pakhat a thi bawk.

J&K DGP SP Vaid chuan nimin zing khan security force leh firfiakte hi an inkap a, firfiak pahnih kahhlum niin midangte pawh zawn mek an nih thu a sawi. He inbeihnaah hian police pakhat a thih bakah, sipai pahnih leh civil mi pahnihin hliam an tuar bawk a ni.

Amarnath Yatra neih anih dawn vangin sorkar laipui chuan J&K-a venhim hna thawk tur hian Ningani khan National Security Guards (NSG) chu Srinagar-ah a tir bawk. Commando-te hi firfiak leh sorkar laka helte pawikhawihna thlen tur vengin an awm dawn a, Srinagar airport-ah dah an ni bawk ang. NSG sniper 20 chuang chu Huhama Sringar-a BSF headquartres-ah an camp tawh a ni.

Jammu and Kashmir-a NSG commando tirhte hi ralthuam ṭha ber hmanga thuam an ni a, mahse an ralthuam hmante hi Ministry of Home Affairs chuan kimchangin a puangzar duh lo.

Ramzan thla puala security force-ten inkahhai an puan tihtawp a nih hnuah firfiakte lakah beihpui thlak chhunzawm leh nghal a ni a, hmun eng emaw zatah security force leh firfiakte inbeihna hi a thleng leh tawh a ni.

Amarnath Yatra chhunga firfiakten remchanga hmanga India ram an lutru tur venna atan International Border leh Line of Control-ah pawh venhimna tihkhauh a ni. Jammu and Kashmir Governor NN Vohra chuan security force-te chu inralring reng turin a chah. Border police station, post leh check-point ah pawh venhimna khauh zawka kalpui a, firfiakte chet tumna dang tura inring reng tura hriattir an ni.