Delhi khawpuia truck luh khapna pawtsei

Delhi sorkar chuan nitin mamawh phurtu ni lo, non-essential item phurtu truck-te khawpui chhunga luh a khapna chu tunkar Zirtawpni thleng atan a pawtsei.

Khawpui boruak bawlhhlawlh tihziaawmna tura hmalakna pakhatah motor liante hi Delhi khawpui chhungah an tlan luh khap an lo ni tawh a, hei hi sorkar chuan a pawtsei leh ta a ni. Hei bakah hnathawktute pawh Zirtawpni thleng chu in lam aṭanga hna thawk turin a ti bawk. School leh college-te pawh thupek thar tihchhuah leh hma chu khar chhunzawm zel an la ni ang.

Delhi-a in sak hna leh ṭhiah hna thawh khapna te erawh hlih an ni thung.

"Boruak bawlhhlawh zel tur thlir chung leh, air quality a chhiat em em laia lirthei khuin nasa zawka boruak ṭha lo a pekchhuah theih avangin lirthei chetvel dan khuahkhirhna pawhsei hi a ṭul takzet a ni," tiin environment department thuchhuak chuan a tarlang.

"November 26 thlenga nitin mamawh phur ni lo truck te luh khapna dan siam a ni a, hei hi ennawna pawhsei leh theih a ni ang" a ti.

Commission for Air Quality Management (CAQM) thupek bawhzuiin, Delhi sorkar chuan kar liam ta Nilaini khan thupek 10 an tichhuak a, heng zingah hian nitin mamawh ni lo phur truck khawpuia luh khapna dan leh school leh college kharna turte a tel.