AP sorkarin capital bill pathum hnukdawk

Andhra Pradesh sorkar chuan nimin khan khawpui pathum siamna tur bill pathum a siam chu a hnukdawk.

Nimina assembly complex-a cabinet ṭhukhawm chuan bill pathum hnuhdawk hi an rel a, advocate general kaltlangin an thutlukna hi high court-ah an hriattir nghal a ni.

Chief minister Jaganmohan Reddy kaihhruai sorkar hian kum 2020, January thla khan an state-a khawpui pathum siamna tur bill pathum a pharh a ni. Heng bill-te hi judicial capital atan Rayalaseem region-a Kurnool siam te, executive capital atan north Andhra region-a Visakhapatnam siam leh, legislative capital atan coastal region-a Amaravati siam rawtnate an ni.

Heng bill pathumte hi eptu lam party-ten an sawisel vek a, capital atana Amaravati siam a nih theihna tura an ram petu, loneitute pawhin nasa takin an dodal a, high court-ah pawh petition eng emaw zat thehluh a ni bawk.

Legislative assembly-ah bill te pass ni tawh mah se, legislative council-ah tikhawtlai a la ni. Rorellai YSR Congress party hian legislative council-ah majority a neih avangin a tlang mai rin a ni a, mahse hetih lai hian sorkar lam hian a thutlukna hi sut lehin, bill pathumte hi a hnukdawk leh ta vek a ni. Sorkarin a thu a thlakna chhan hi sawichian a la ni lo.