CAA hnuhdawh a nih loh chuan Shaheen Bagh protest ang kha kan thlen tir leh ang : AIMIM chief

All India Majlis-e-Ittehadul Muslimeen (AIMIM) President Asaduddin Owaisi chuan sorkar laipui chu Citizenship Amendment Act (CAA) hnukdawk tura ngenin, an hnukdawk lo a nih chuan mipui lungawi lote'n Shaheen Bagh-a hun rei tak lungawi lohna an lantir ang khan an huaihawt leh dawn tih a sawi.

CAA duh lohna lantirin kum 2019, December 15 aṭanga 2020, March 24 thleng khan Delhi-a Shaheen Bagh-ah lungawi lohna lantir a ni tawh a, he nawrh hi Muslim hmeichhiate kaihhruai niin tharum hmang loin Shaheen Bagh-a kawngpui pawimawhte hun rei tak an dang a ni.

Owaisi hian Barabunki-a mipui hmaa a thusawinaah BJP sorkar chu Farm law pathum an sut ang bawka CAA sut ve tura ngenin, sut a nih loh chuan Shaheen Bagh-a thil thleng ang khan Uttar Pradesh-ah an thlentir ve dawn tih a sawi a ni.

"Sorkarin National Population Register (NPR) leh National Register of Citizens (NRC) chungchangah dan an siam a nih chuan kawtlaiah kan pungkhawm leh ang a, Shaheen Bagh kan lantir leh mai ang. Kei ngei pawh a hmunah hian ka rawn kal ang," tiin Owaisi chuan a sawi. Nakkuma state assembly inthlan neih turah party dang nena an thawhho tur thu leh, inbiakna an neih mek thu a sawi bawk.

Kum 2022-ah Uttar Pradesh chuan assembly inthlan a nei dawn a. Kum 2017-a assembly inthlanah khan Bharatiya Janata Party (BJP) chuan seat awm zat 403 aṭangin seat 312 an la a, Samajwadi Party (SP)-in seat 47, Bahujan Samajwadi Party (BSP)-in seat 19 leh Congress-in seat sarih chauh an la thei a ni.