Mann ki Baat: PM-in Indian doctor-te a fak

Prime Minister Narendra Modi-an thla tina radio programme a hman ṭhin, Maan Ki Baat vawi 45-na chu nimin khan a hmang leh. Nimina a thusawiah hian International Yoga day hman tak leh, Doctor's Day thleng tur chungchangte a sawilang a ni.

Maan Ki Baat programme hi All India Radio(AIR), Doordarshan leh channel dangah te pekchhuah a ni a, mobile phone aṭanga ngaithla duh tan 1922-ah missed call siamin an ngaithla thei bawk a ni. Hei bakah hian Prime Minister's Office official YouTube channel-ah pek a ni bawk.

PM Modi chuan June 21-a ramchhung leh rampawna 4th International Yoga Day hlawhtling taka hman a ni chu lawmawm a tih thu a sawi. Modi chuan ram indinna kawnga doctor-te thawh hlawk dante sawiin, doctor te leh medical lama thawktute a fak thu a sawi.

Modi chuan Jallianwala Bagh massacre chungchang pawh sawichhuakin, tharum thawhna leh rawng taka thiltih chuan buaina engmah a chingfel lo a, a tawpa dingchang chu muanna leh tharum tel loa beihna a ni zel a ni, a ti.

PM chuan Bharatiya Jana Sangh dintu, Syama Prasad Mookerjee pawh ram inpumkhatna leh industry hmasawnna tura a hnathawh avangin zahna a hlan bawk. Mookerjee hmalaka avang hian Bengal ṭhenkhat chu humhim niin, tun thlengin India ram peng pawimawh tak a nih theih phah a ni, a ti.

BJP kaihhruai NDA sorkarin scheme a siama hamṭhatna dawngtute thil tawn hrang hrangte pawh sawichhuakin, agragrian sector-a hmasawnna kalpui dante PM chuan a sawi. Bengaluru-a corporate professional leh IT engineer-te chu thawkhoin ‘Sahaj Samridhi Trust’ an din a, an thiamna te chu loneitute an thlai thar aṭanga an sum lakluh a leta an tihpun theih dan tur ngaihtuahin an hmang mek a ni, a ti.