Delhi khawpuia thingkung kih tumna mipuiten dodal

Delhi khawpui chu khawvela khawpui boruak bawlhhlawhna ber zinga mi ni mah se, development project thawhna tur tiin thingkung kih belh reng a ni. Thingkung 14,000 kih belh leh tum a ni a, hei hi khawchhung mite leh environmentalist-ten nasa takin an dodal.

Sorkar laipui chuan Delhi chhim lama colony paruk- Sarojini Nagar, Naoroji Nagar, Netaji Nagar, Thyagaraja Nagar, Mohammadpur leh Kasturba Nagar-a development project thawhna tur hian National Buildings Construction Corporation (NBCC) leh Central Public Works Department (CPWD) hnenah thingkung kih phalna a pe a, Environment Ministry pawhin clearance a pe a ni. Forest Department chuan central sorkar hnuaia thawk, Delhi-a awmte chenna quarters sakna tur atan hian thingkung puitling tawh 14,000 kih phalna chu tunhnaiah a pe ve leh a ni.

Thingkung kihna tur phalna pek hi duh loin Delh High Court-ah petition thehluh a ni a, June 22 khan court chuan ngaihtuahin he thupek hi a dang duh lo a ni. Hei vang hian Pathianni khan thingkung kih tum duh lohna lantirin, Sarojini Nagar-ah mi 1,500 velin thingkungte kuahin venhim tiam nan heng thingkungahte hian ribbon hring an tar a ni. Mipuiten dodalna an lantir avang hian NBCC chuan colony paruk-a thingkung kih tur hi July 4 thleng kalpui hrih loh a remti.

Agency-te chuan thingkung pakhat an kih aiah thingṭiak 10 zel phun tiam mah se, environmentalist-te chuan khawpui boruak tithianghlimtu thingkungte hi kih belh zel an remti lo tih an sawi. Thingkung kih belh tuma hmalakna hi mipuite chuan dodalin, khawchhung boruak a chhiat zual phah dawn niin an sawi. Hei hian khawpuia cheng mihringte hriselna thlengin a nghawng pawi thei dawn niin an sawi a ni.

Khawpui chhunga thingkung kih tir chungchangah Delhi-a Aam Aadmi Party (AAP) sorkar leh central-a BJP kaihhruai NDA sorkar an inpuhtawn. AAP chuan Pathianni khan thingkung kih duh lohna an lantir a, hetihlai hian union minister Hardeep Singh Puri chuan thingkung an kihna biala ram hring chin chu a let thum zetin a la pung chho dawn a ni, a ti. A thusawi hian Twitter lamah beih zui a hlawh hle.