Maha-in plastic khap vangin mi nuai 3 hna chan

Maharashtra sorkar chuan kar kalta Inrinni aṭang khan state pumah plastic hman a khap a, he khapna hian plastic bag bakah thermocol pawh a huam tel vek a ni. Plastic hman khap vang hian kum khatah industry-te chuan cheng vaibelchhe 15,000 vel hlohin, mi nuai thum dawnin hna an chan phah niin plastic manufacturing industry chuan a tarlang.

Plastic Bags Manufacturers Association of India general secretary Neemit Punamiya chuan state sorkarin khapna thupek a siam hian plastic industry-te a nghawng na hle tih a sawi a, zankhat thilthuah mi nuai thum dawn chuan hna an chan phah thei dawn a ni, a ti. Sorkarin khapna thupek a hman ṭan avangin association member 2,500 vel chuan dawr khar mai loh chu thlan tur dang an nei lo a ni tiin, sorkar thiltih dan chu inthliarna angah an ngaih thu a sawi.

March 23 khan state sorkar chuan plastic hmanrua leh thermocol item-te siam, hman, hralh leh thehdarh bakah chhekkhawlte a khap dawn tih a sawi. Hetiang thil lo chhekkhawlte chu tihralna turin thla thum hun a pe a, a hun pek hi June 23 khan a tawp a ni.

Plastic industry-te chuan he khapna siam vanga mi tam takin hna an chah phah avangin state GDP thlengin a nghawng dawn tih an sawi a, plastic sector lama bank loan ba pawh a tam phah dawn a ni, an ti.