Ruahsur nasain Mumbai nunphung tibuai

Pathianni khan Mumbai khawpuiah ruah nasa tak a sur leh avangin khawpui nunphung a tibuai hle a, rel service thlenga a nghawng buai bakah motor tlan vel pawh a buai phah hle. Hmun hniam lama chengte chu tui tlingin a tibuai hle a ni.

Pathianni zing dar 8:30 leh tlai dar 4:30 inkara Mumbai-a ruah sur hi 110.80 mm a tling niin Met department official-te chuan an sawi a, nimin khan nasa taka sur chhunzawm rin a nih thu an tarlang bawk.

Mumbai chhim lama Metro Cinema bula thingkung tluin Pathianni khan mi pahnih a delh hlum. Nimin zing khan Ambernath taluka-a Wadol khuaa an in bang chimin mipa naupang a delh hlum a, a nu leh paten hliam na tak an tuar bawk. Thane-a in hungna bang feet 65-a sang chu nimin zing khan a chim bawk a, a hnuaiah motor pahnih a delh a ni. Mumbai chhim lam, Antop Hil-a Llyod's Estate hungna bang chu nimin zing khan a chim a, car 12 a delh bawk.