Kum 2019 inthlanpui hmain Ram Mandir kan sa ang: UP CM

Uttar Pradesh Chief Minister Yogi Adityanath chuan kum 2019 Lok Sabha inthlanpui neih hmain Ram Mandir sak ṭan ngei a nih tur thu a sawi.

CM Adityanath hian nimina 'sant sammelan' (seers' meet) a hmanpuinaah he thu hi sawiin, Hindu puithiamte chu democratic system-ah rinna nghat ngam tur leh, dawhthei turin a fuih. Hemi hma hian BJP hruaitu leh MP hlui Ram Vilas Vedanti chuan Mughal lal Babur khan temple tichhe turin eng court thupek mah a nei lo tih a sawi a, kum 1992 -a Babri Masjid ṭhiah pawh kha court thupek anga tih a nih loh thu a sawi a ni.

Vedanti chuan Babri Masjid

ṭhiahna hmuna Ram Lalla lim a rawn lang nawlh ang khan, temple sak hna pawh ṭan leh thuai a ni dawn tih a sawi.

Adityanath chuan Ram Mandir sak tumna chu a thlawp thu a sawi a, hemi rual hian,"Khawvela democracy ram lian berah kan cheng a, democratic system hnuaiah judiciary, executive leh legislature-te chuan mawhphurhna hran vek an nei a ni. Heng dante hi kan rilrua kan hriat ve a ngai a ni", a ti. UP CM chuan Ayodhya-ah chuan temple sak a la ni ngei dawn tih a sawi a, hei hi ringhlel lo turin Hindu puithiam ho pawh a chah. Dawhthei taka an lo nghak tawh angin, hun eng emaw chen chu lo nghak leh turin a ti a ni.

Hetih lai hian Vishw Hindu Parishad chuan Ayodhya-a Ram Mandir sak tura an nawrna chu kalpui ṭan leh an tum tih an sawi a, hemi chungchangah hian Supreme Court-in thla thum/li chhunga thutlukna a siam loh chuan an sakhaw puithiamte rawnin hma lak zel dan tur sawipui an tum.