Textbook-ah emergency chungchang tam zawk dah tum

Union Human Resources and Development Minister Prakash Javadekar chuan ṭhangtharten India democracy-a hun thim lai ber tia sawi ṭhin, Emergency chungchang chiang zawka an hriat theih nan zirlaibu-ah emergency chanchin ziahna chapter tam zawk dah an tum tih a sawi.

Union Minister chuan, " Kan textbook-ah Emergency chungchang zirna chapter-te chu ennawnin, tam zawk dah kan tum a ni. Hemi atan hian kan bei mek a ni", a ti. Hemi hnu hian Prime Minister Narendra Modi-an a twitter-a Emergency chungchang a sawina chu a retweet ve leh a ni. PM chuan emergency hunlai chu India-in a hun tawn hrehawm ber niin mitinte rilru hlauhnain a luah a, mipuite chauh ni loin ngaihdan leh zalennate pawh politics avangin hrekbeh tlat a ni, tiin a sawi a ni.

Minister hian Indira Gandhi kaihhruia Congress sorkarin kum 1975, June 25-a emergency a puan laia BJP worker, jail-a tangte chawimawina hun party headquarters-a buatsaih a hmanpuinaah he thu hi a sawi a ni. Emergency hunlaia mipuite dikna chanvo humhalhna tura beitu Jan Sangh veteran-te a fak thu a sawi bawk.

Congress party bei nghalin, Javadekar chuan BJP chuan ram dah pawimawh hmasa berin a dawtah party, a hnuhnung berah mahni an indah a, mahse Congress chuan mahni indahpawimawh berin, ram chu a hnuhnung berah a dah a ni, a ti.

Hetih lai hian BJP hruaitu hlui Yashwant Sinha chuan BJP kaihhruai NDA sorkar chu pawisa note lian pahnih tih thih aṭanga ninga hnua BJP president Amit Shah-a director a nihna, Ahmedabad District Cooperative Bank-a cheng vaibelchhe 745.58 thleng a nih chungchang chhui chiang duh lohah a puh. Yaswant Singh chuan Indira Gandhi hunlaia emergency a puan aia dinhmun ṭha loah India chu a awm mek a ni tiin, BJP sorkar hnuaiah India ram democracy chu dinhmun hlauhawm takah awmin ram danpui te chu nuihzatburah an siam niin a sawi. Sorkar agency leh institution-te chu dik lo taka hmangin, sorkar chuan a duhdan ang angin a kuaiher mai niin a sawi.