Van Dhan scheme: Sorkarin centre 3,000 hawn tum

Sorkar laipuiin tribal-te dinhmun chawikanna tura a scheme siam, Van Dhan scheme hnuaiah ramchhung hmun hrang hrangah centre, Van Dhan Kendra 3,000 din a tum.

Ministry of Tribal Affairs chuan heng centre-te hi a mamawh zual district-ah te dahin, he scheme hian ramchhunga tribal area zawng zawng tuamchhuah vek a tum tih a sawi. He project hi Tribal Cooperative Marketing Development Federation of India-in a thawk dawn a ni.

Ministry of Tribal Affairs leh TRIFED-ten Van Dhan scheme an siam hi kumin April 14 khan Prime Minister Narendra Modi chuan a hawng a, he scheme hi ramchhunga tribal mite dinhmun chawikanna tura tih a ni. Van Dhan hnuaiah hian Self Help Group 10 din a ni a, heng mite hi training pein hnathawh ṭanna tur sum pek a ni. Collector kaihhruaina hnuaiah hna thawkin, an thil siam chhuahte chu state chhungah chauh ni lo, state pawn lam thlengin an zuarchhuak thei dawn a ni. Training leh technicial support hi TRIFED-in a pe thung a ni.