NIA-in Kashmir rights activist Khurram Parvez man

National Investigation Agency (NIA) chuan Thawhṭanni khan Jammu and Kashmir-a human rights activist hriat hlawh tak, Khurram Parvez chu firfiakte suma puia puhna chungchangah an man. Dan khauh tak, Unlawful Activities Prevention Act (UAPA) leh Indian Penal Code-a section hrang hrang hnuaiah thubuai a siamsak zui nghal bawk.

NIA hian Thawhṭanni zing khan Sonwar-a Parvez-a chenna in leh, Srinagara-a Amira Kadal hmuna a office an dap hmasa a, chawhnu lamah a chenna in aṭanga manin agency office-ah thu zawhfiah turin an hruai nghal a ni.

Agency hian nikum October thla khan Kashmir Valley-a Parvez chenna leh a office-te an lo dapsak tawh bawk.

Kum 2016 khan Switzerland-a United Nations Human Rights Council session 33-na hmang tura kal a tum chu India thuneitute chuan khapin an man zui a, Public Safety Act (PSA) hnuaiah thubuai siamsakin an hreng zui a ni. He dan hnuaiah hian kum hnih chhung hren theih a ni . Mahse ni 76 hren a nih hnuah international rights group hrang hrangte nawrna avangin tan-in aṭangin chhuah a ni.

Parvez hi Asian Federation Against Involuntary Disappearances (AFAD) chairperson leh Jammu Kashmir Coalition of Civil Society (JKCCS)-a programme coordinator nilai a ni a, kum 2004 Parliament inthlan dawna thil an enfiahna hmunah chilpuah bomb puak vangin a ke lehlam a lo chan tawh a ni.

Parvez man a ni hi activist leh midang tam takin social media lamah an sawisel nasa hle a, human rights humhalhna tura beitu hrem leh hupbeh tumna a ni, tiin chhuah turin sorkar an phut thu an sawi.

UN Special Rapporteur on Human Rights Defenders, Mary Lawlor chuan Parvez man a ni hi pawi a tih thu sawiin, "Firfiak a ni lo a, human rights tana beitu zawk a ni," tiin a twitter-ah a tarlang.

Parvez hian BJP kaihhruai sorkar a sawisel fo a, Kashmir-a a pawl din, Jammu Kashmir Coalition of Civil Society (JKCCS) pawhin security force-ten Kashmir Valley-a mihring dikna an palzut dan leh, dik lo taka a chet ṭhinte dan report pawh a lo tichhuak fo tawh a ni.