Congress-in Parliament session laiin rally huaihawt tum

Congress party chuan ram chhunga tuialhthei man sang duh lohna lantirin, Parliament Winter Session neih lai, December thla chawlhkar hmasa hian Delhi khawpuiah rally lian tham tak huaihawt an tum . Kum 2019 hnua punkhawmna liantham an huaihawt lehna hmasa ber tur a ni.

Rally neih ni tak tur hi tihchian la ni lo mah se, Pathianni-ah neih tum a ni a, December 5 emaw 12-ah emaw, an rally neihna hmun tur remchan dang anga ruat tum a ni. He rally hi Congress party-in prime minister Narendra Modi sorkarna thil man sang chak duh lohna lantira a, kar hnih awh Jana Jagran Abhiyan an buatsaih kharna atan hman nghal a ni ang.

Party general secretary Priyanka Gandhi Vadra chuan party hotute hmuin, rally neih dan tur ruahmannate an siam a ni. Meeting-ah hian Punjab chief minister Charanjit Singh Channi, Punjab Congress chief Navjot Sidhu, Haryana chief minister hlui Bhupinder Hooda, general secretary (organisation) KC Venugopal, party hotu Sachin Pilot-te pawh an tel.

Sorkar laipui chuan Congress party-in rally huaihawtna atan Ramleela ground hman a dilna chu ala pawmpui lo a, pawmpuina an pe thei lo a nih chuan Congress hian Dwaka ground lamah insawn an tum.

Nimin thleng khan ram chhunga ni 19 chhung fuel man a la ngai a ni. Tun thla tir, Diwali kut thlen dawna sorkar laipuiin fuel-a chhiah lak a tihniam hnu khan petrol leh diesel mante chu tlemin a tlahniam deuh a, mahse hetichung hian khawpui tam takah chaun petrol litre khat man hi Rs 100 a la chuang tho a ni.