AIIMS Director-in Covid booster dose a ngai lo tih a sawi

AIIMS Director Dr Randeep Guleria chuan India ramah tun dinhmunah chuan Covid-19 vccine booster dose a ngai lo tih a sawi a, hri leng chuan ziaawm lam a pan zel avangin hri leng thawh thumna na tak pawh a thlen a rinawm loh tih a sawi bawk.

"Hri kai thar an pung nasa tawh lo a, hei vang hian booster dose hi kan mamawh rih lo a ni," tiin Dr Guleria chuan ram puma Covid vaccine pek chhuah kalpui dan chu a fak bawk. Vaccine pek chhuah ṭhat hian hri kai pung zual tur pawh a veng a, nitin hri kai zat pawh hi an tlahniam zel a ni, a ti.

"India rama hri leng thawh khatna leh thawh hnihna nasa tak ang khan a thawh thumnaah chuan thlen a rinawm tawh lo. Hri kai thar hi la awm zel tho mah se, a la na leh ngaihtuahawm zual zat erawh an tlahniam zel a ni," tiin Dr Guleria chuan a sawi.

Union home ministry chuan Thawhlehni thleng khan ram pumah Covid vaccine dose vaibelchhe 118 sem chhuah a ni tawh a, Thawhlehni bik khan zan dar 7 thlengin dose nuai 68 chuang semchhuah a ni.

Thawhlehni khan ram pumah Covid-19 hri kai hmuh chhuah thar mi 9,283 awmin, hri kai mek 1,11,481 an awm a, ni 537 chhunga a hniam ber ṭum a ni. Hripui thihpui hi India ramah mi 4,66,584 an awm tawh bawk. Covid-19 vanga thi hi Maharashtra state-ah mi 1,40,766 awm tawhin, Karnataka-ah 38,182, Kerala-ah 38,045, Tamil Nadu-ah 36,401, Delhi-ah 25,095, Uttar Pradesh-ah 22,909 leh West Bengal-ah 19,407 an awm tawh. India rama Covid-19 thihpui zingah 70% chuang chu natna benvawn nei an ni.

Ni 47 chhung chu a zawnin ni khata hri kai hmuh chhuah thar hi 20,000 hnuai lam a ni tawh a, ni 150 chhunga 50,000 hnuai lam a ni tawh bawk.

Hri kai mek, active case hi hri kai hmuh chhuah tawh aṭangin 0.32% niin, nikum March thla hnua a hniam ber ṭum a ni. Hri kai enkawl dam, recovery rate hi 98.33% niin, nikum March thla hnua a sang ber lai a ni bawk tih union health ministry chuan a sawi.

Covaxin-in 50% in hna thawk

India rama Covid-19 vaccine hman langsar zinga pakhat, Covaxin chuan hri lakah 50% in hna a thawk niin The Lancet Infectious Diseases Journal zirchianna neih chuan a sawi.

Zirchianna hi AIIMS, New Delhi-a thawktu 2,714 lakah kumin April 15-May 15 chhung khan neih a ni. He zirchianna hi India rama hri leng thawh hnihna a len lai, Delta variant a darh nasat lai a ni. Covaxin dose hniha pek tawh, healthcare worker-ah vaccine-in hna a thawh dan hi zirchian a ni. Hetih lai hian vaccine hnathawh chin hniam chhan hi hospital-a hnathawk, hri kai awlsam zualna hmuna awmte lakah chauh zirchian a nih vang nia sawi a ni a, hei bakah hian hri len hluar zual lai, variant hrang hrang a darh lai a nih vang pawh a ni thei tiin report chuan a sawi bawk.

Kumin May - July thla inkara hospital 11-a zirchianna neihah, kum 45 chung lam Covishield leh Covaxin dose kima lak chuan hri kai pawhin an la na lutuk tur lakah a veng ṭha thawkhat nia sawiin, Covaxin dose kima lak chuan 69% leh Covishield dose kima lak chuan 80% velin a veng thei nia sawi a ni.