Delhi-a school leh college-te karleh aṭangin hawng dawn

Delhi khawpui boruak bawlhhlawh avanga school, college, institute leh library kharte chu karleh Thawṭanni, November 29 aṭangin hawn an ni tawh dawn tih environment minister Gopal Rai chuan a sawi.

Khawpui boruak bawlhhlawh belhchhah zel vangin November 13 khan chief minister Arvind Kejriwal chuan school khar tur leh, online class hmanga zirna kalpui rih turin a ti a ni.

Sorkar office, mahni in lam aṭanga hnathawk tura tihte pawh November 29 aṭang chuan pisa an kai thei tawh dawn tih Rai chuan a sawi a. Sorkar hnathawkte chu public transport hmang uar turin a chah nghal bawk.

Delhi khawpuiah hian nitin mamawh phur tih loh motor lian dang luh khap a ni bawk a, non-essential service zingah compressed natural gas (CNG) leh electric truck chu November 27-December 3 chhungin khawpuiah hian an tlan luh phalsak an ni ang. Private CNG bus, sorkarin public transport atana a hmansakte chu Delhi sorkar hnuaia hnathawkte chennabilah tlan tir an ni dawn bawk a ni. Transport department chuan CNG bus 700 dawn chu hmansak an nih thu a sawi.

Nilaini khan Delhi khawpui boruak, air quality index hi 361 la niin, hei hi 'very poor' caterogy a la ni pha tih Central Pollution Control Board bulletin chuan a tarlang.

SC-in Delhi-NCR ah in sak khap nawn leh
Boruak bawlhhlawh zual zel vangin Supreme Court chuan Delhi khawpui leh National Capital Region (NCR) ah in sak a khap nawn leh. He khapna hi a nghawng state sorkarte hnenah in sakna hmuna thawk, hna thawk thei loa awmte chu labour tax an lak aṭangin chhawmdawlna pe turin a ti.

Chief justice of India NV Ramana kaihhruai special bench chuan Nilaini zan khan he thupek hi tichhuakin, NCR leh a chhehvel biala Commission for Air Quality Management hnenah kum hmasa lam data-te nena thlir a, air quality chungchangah scientific study nei turin a ti a ni.

NCR state - Delhi, Uttar Pradesh, Haryana, Punjab leh Rajasthan-te chu boruak bawlhhlawh zual tur venga an hmalaknate pawh chhunzawm zel turin a hrilh nghal bawk.

Supreme Court-in in saknaa thawkte chhawmdawlna pe tura a hriattir hnuah, nimin khan Delhi sorkar chuan khapna siam a nih avanga in sakna hmuna thawk, hna thawk thei loa awmte chu an banck account-ah Rs 5,000 ṭheuh a dahsak tur thu a puang nghal a ni. Chief minister Kejriwal chuan construction worker-te bank account-a pawisa dah sak tur hian thupek a tihchhuah tawh thu a sawi.