PM Modi-a'n Noida Airport lungphum phum

Prime minister Narendra Modi chuan nimin khan Uttar Pradesh-a Gautam Buddh Nagar district-a Jewar khaw bula Noida International Airport siamna tur lungphum a phum .He airport hi Uttar Pradesh-a international airport pangana tur niin, state zingah nei ngah ber a ni dawn a ni.

Union civil aviation minister Jyotiraditya Scindia chuan Noida Airport hi Asia rama airport lian ber tur a nih thu sawiin, a siamna leh peihfel a nih hnuah pawh mi nuai chuang tan hna thawh tur a siamsak dawn a ni, a ti.

Sorkar laipui chuan Noida airport siam tur hi prime minister Narendra Modi-a'n aviation sector changtlung zawk siamna tura a hmathlir neihte tihhlawhtlinna pakhat a ni dawn tih sawiin, nakkuma assembly inthlan neihna tur UP pawh hi a ngaihven zual bik a ni dawn tih a sawi a ni.

Airport thar siam tur hi Delhi-a Indira Gandhi airport aṭangin km 72 vela hla, Noida khawpui aṭangin km 40 vela hla a ni dawn a, ram hectare 1,300 chuangah siamin, a siam hna thawh khatna hi Lok Sabha inthlanpui neih kum, kum 2024-ah zawh hman tum a ni a, kum khat chhungin khualzin vaibelchhe 1.2 vel a dawngsawng thei tura ngaih a ni. He airport siamna atan hian cheng vaibelchhe 10,500 ruahman a ni bawk.