Sipai hotuin UN report a pawm lo

Khawmual sipai hotu lu ber, General Bipin Rawat chuan Jammu and Kashmir chungchanga United Nations report siam chu a pawm lo tih a sawi a, he report hi midangte fuihna vanga siam a ni, a ti.

General Bipin Rawat chuan report ṭhenkhat a tarlante chu midangte fuihna avanga siam a ni a, hei vang hian J&K chungchanga UN report siam hi sawi zui tlak pawh a ni lo tiin a sawi. He report hian ngaihven pawh a hlawh vak lo niin a sawi bawk. Rawat chuan Army-te human rights record chu a ṭha tawk hle a, hei hi India ram mipui leh khawvel pawhin an hrechiang a ni tiin a sawi.

Sorkar laipui pawhin Kashmir chungchanga UN report hi a lo sawisel tawh bawk a, thil hriatchian leh finfiahna awm loa siam a ni, a ti. Ministry of External Affairs chuan UN report hian India-in a ram china thu a neihna leh a dikna palzut sakna a ni, tiin a sawi.

MEA chuan Jammu and Kashmir pum chu India ram chin a nih thu sawiin, Pakistan chuan dan loin leh tihluihna hmangin hmun ṭhenkhat chu a luahluih sak niin a sawi. Pakistan hnenah a ram luah chin chhuahsan tura vawi tam tak ngen a nih thu a sawi bawk.

Tun thla tir lam khan United Nations Human Rights Office chuan J&K chungchanga a report hi a tichhuak a, phek 49 zeta chhah niin Kashmir-ah India leh Pakistan chuan mihring dikna chanvo nasa takin an palzut niin a tarlang a ni.