Rajasthan Labour Department-in hnathawkte jeans hak a phal lo

Rajasthan-a Labour department chuan an deparmtent hnuaia thawkte chu office-ah thawmhaw zahawm taka inthuam tura hriattirin, jeans leh T-shirt te inbel lo turin a hriattir. Department thuchhuah hi state employees' federation chuan na takin a sawisel nghal a ni.

Labour Commissioner Giriaj Singh Kushwaha chuan hnathawktute inthuam dan tur chungchanga hriattirna hi June 21 khan a tichhuak a ni.

Office-a hnathawk tam tak chu jeans, T-shirt leh thawmhnaw zahawm vak lo hain an kal fo a, hei hian office zahawmna a tichhia niin an thuchhuah chuan a tarlang. Hei vang hian officer leh thawktu dangte chu department zahawmna vawng nung tura zahawm taka inthuam vek turin a ti a ni. Commissioner chuan an thuchhuah siam hi office inkaihhruaina tura tih a ni a, a hma pawhin hetiang thuchhuah hi a lo siam tawh niin a sawi. Hriattirna a tihchhuah chungchangah hnathawktu lam aṭangin sawiselna engmah a dawng lo niin a sawi.

All Rajasthan Employees Federation (united) president Gajendra Singh chuan Labour Department thuchhuah hian dodal tur thu sawiin, commissioner hnenah pawh thupek hi sut leh nghal tura an ngen dawn thu a sawi.