Special Protection Group clearance tel loin minister, officer-ten PM an hnaih phal lo

Union Home Ministry chuan security guideline thar a siam a, he dan siam thar hnuaiah hian Special Protection Group (SPG) phalna lo chuan Prime Minister Narendra Modi hnaih lutuk phal a ni dawn lo a, hei hian minister leh officer-te pawh a huam tel dawn a ni.

Official-te chuan kum 2019 inthlanpui neih tura inbuatsaihna kal chho mekah, PM chu misualten an beih chak ber a nih thu sawiin, venhimna pek ṭhat a ngai hle niin an sawi. PM tana thil hlauhawm thleng thei reng a nih vangin, amah vengtu special security-ten an remti lo a nih chuan tumahin an hnaihchilh lutuk tur a ni lo, an ti.

SPG hian Lok Sabha inthlanpui neih tur atana a campaign-naah, PM Modi chu road show a neih ṭhinte titlem a, vantlang inkhawm uar zawk tura an duh thu an sawi a, hei hi amah venna kawngah pawh a awlsam zawk dawn niin an sawi.

June 7 khan Pune police-te chuan Delhi mi panga, dan pawna hnawl CPI(Maoist) nena inzawmna nei an man zinga pakhat kut aṭanga lehkhathawn a manah, PM Modi chu Rajiv Gandhi thah a nih dan anga thah tum a nih thu an ziahna te an hmu a, hei hi court-ah an hriattir a ni. Hemi hnu hian PM security chungchang hi ngaithuah ṭhain, security guideline thar hi siam a ni ta a ni.