PM-in 2019 inthlanpui atan campaign a ṭan

Prime Minister Narendra Modi chuan kum 2019 Lok Sabha inthlanpui neih tur atana campaign bul ṭanna chu nimin khan Uttar Pradesh-a Maghar khuaah vantlang inkhawm neiin a ṭan. Maghar hi PM bial, Varanasi aṭanga km 20 vela hlaa awm a ni.

Vantlang inkhawm buatsaiha thu a sawiah PM chuan, "Party ṭhenkhat remna leh hmasawnna duh lo a, buaina siam tlat an awm. Buaina a awm chuan politics lamah an hlawkpui dawn niin an ngai tlat a ni. Heng mite hian Sant Kabir, Mahatma Gandhi leh Baba Ambedkar-te ram nihna dik tak hi an hre lo a ni", a ti.

India rama emergency puan chungchang a sawichhuak leh a, mahse emergency lo puang tawhtute leh a hunlaia nasa taka dodaltute chu thuneihna an duh avangin an thawkho leh ta niin a sawi. Heng mite hian khawtlang mipuite ṭhatna tur lam ngaihtuah loin, anmahni leh an chhungte chauh an ngaihtuah niin a puh bawk.

PM chuan Samajwadi Party hotu leh Uttar Pradesh Chief Minister Akhilesh Yadav pawh bei zuiin, tunhnaia a bungalow a chhuahsan dan chungchangah heng hruaitute hian an mipuite aiin an bungalow pawh an ngaihsak zawk niin a sawi.