Kum li chhungin Prime Minister-in ram 52 a tlawh

Prime Minister Narendra Modi chu kum li chhungin ṭum 41 zin chhuakin ram 52 a tlawh a, a zinna senso hi chneg vaibelchhe 355 a tling. Kum li chhung hian ram pawn lamah ni 165 hun a hmang hman a ni.

RTI activist Bhimappa Gadad-an Right to Information (RTI) hmanga zawhna a thehlut, Prime Minister's Office (PMO) in a chhannaah hei hi tarlan a ni.

PM Modi hi ram 52 tlawha ṭum 41 a zinchhuahnaah hian, a zin ṭum khata a cham rei ber chu kum 2015 April 9-15 inkara ni kua chama France, Germany leh Canada a tlawh kha a ni. Hemi ṭuma a zinna senso hi Rs 1,25,78,000 a ni. A zinna senso tlemna ber chu kum 2014, June 15-16 a Bhutan a tlawh kha niin, Rs 2,45,27,465 sen a ni a, hei hi PM a nih hnua ram pawna a zinchhuah hmasa ber a ni.

RTI hmanga zawttu, Gadad chuan PMO hian ramchhunga PM zinkual dan leh sum sen zat te an pe tel lo tih a sawi. "Ram chhung a zinna chungchang, sum sen ral zat leh security pek a nih dante min pe tel lo a ni. Security chungchang hi ka zawh ber a ni lo a, mahse sum senral zat hi ka zawt tel a, hei pawh hi min pe tel duh lo a ni", a ti. PM zin kualna atana sum senral zat mipuite pawhin an hriat ve vek a duh tih a sawi.