Indira Gandhi khan ram hum nan emergency a puang : Ashok Gehlot

Bharatiya Janata Party (BJP) in tunhnaia Indira Gandhi prime minister laia emergency a puan chungchang nasa taka sawichhia a, a thuneihna humna leh a chhungte himna tura thilti nia an puhna chu Congress hruaitu hlun leh Chief Minister hlui Ashok Gehlot chuan a chhang let.

Jaipur-a press conference a neihah Gehlot chuan, " Indira Gandhi khan ama tan leh a chhungte tan ni loin, ram venhimna turin Emergency kha a puang a ni. Hetianga dik lo taka puhtute hian Gandhi chhungkaw member hian constitutional post hi kum 30 zet an chelh tawh lo tihte an hriat a ngai a ni", a ti.

India mipuite chuan emergency puan hnuah an duhthlanna ngeiin Congress party chu an hnawlin an titla a, mahse a hnu kum hnih leh a chanve lekah sorkar siam turin an thlang tling leh a ni tiin Gehlot chua a sawi.

Kum 1975 June 25 zanlai khan Indira Gandhi hian Allahabad High Court-in Lok Sabha member atana thlan tlin a nih dan chu dik tawk lo nia a puan hnuah, eptuten prime minister a nihna aṭanga bantir tuma nawrna tur beihpui thlak an tum vangin ramchhung inrelbawlnaah harsatna a awm tiin emergency hi a puang nia record a ni. He emergency puan chungchang hi tunhnaiah BJP hian an thar thawh leh a, Congress beihna atan an hmang nasa hle.

Gehlot chuan BJP leh an party hruaitute chuan anmahni an intihniam nia sawiin, social media-ah prime minister hlui Jawarhalal Nehru leh Indira Gandhi-te chungchangah thu dik tawk lo thehdarhin mipuite rilru hruai kawi an tum a ni, a ti. Prime Minister Narendra Modi chu Pandit Jawaharlal Nehru-a dinhmun lo chelh tawh chelh ve theia a awm avangin a inchhuang hle zawk tur a ni, a ti.