Congress hruaitu Azad leh Soz te lakah complaint thehlut

Congress hruaitu hlun pahnih Ghulam Nabi Azad leh Saifuddin Soz-te chu Indian Army sawichhiatna lam hawia thu an sawi avangin Delhi Court-ah sorkar sawisela leh hel tura midang fuihna lam hawi thu sawia puhna complaint thehluh a ni.

Complaint hi Patiala House Court-a advocate Shashi Bhushan thehluh a ni.

Ghulam Nabi Azad hian sipaiten Jammu and Kashmir-a beihpui an thlakah sipaite kutah firfiak aiin civil mi an thi tam zawk niin a sawi a ni. Union minister hlui Saifuddin Soz pawh hian kar hmasa khan Kashmir-a zalenna chu thil theihloh a ni tiin, kawng awmchhun chu an harsatna tawhte chinfel dan kawng zawnga pawl hrang hrangte an ṭhutho a, inbiakna an neih chauhin a ni, a ti. Pakistan president hlui Pervez Musharraf-a'n Kashmir mite hnena thuneihna sang zawk pek a rawtna pawh a thlawp thu a sawi bawk.

Court-a complaint a thehluhah, advocate Bhushan chuan Azad-a thusawi dan aṭang chuan sipaite chu pawisawi lo civil mite thattu ang an lan thu a sawi a, hei hi ram laka indo puan ang mai a ni, a ti. Jammu and Kashmir chief minister hliu Mehbooba Mufti-i pawh inhuatna thehdarh leh ram hmel tihchhiat tumah a puh bawk a ni, Bhushan chuan a tibawk.

Tunhnaia Jammu and Kashmir-a People's Democratic Party (PDP) nena ṭangrual sorkar siam titawptu, BJP chuan Azaad leh Soz te chu an thusawi avang hian a chunga action lak ngei an phut thu an sawi bawk. Hei bakah hian party hruaitute thusawi avang hian Congress chu thupha chawi turin an phut bawk a ni.