CISF-in AK 47 mu laka him thei bulletproof jacket phut

Central Industrial Security Force (CISF) chuan airport-a duty an sipaite hman mek, bulletprooj jacket chu firfiakten an hman ber ṭhin, AK 47 assault rifle lakah a him tawk lo tih sawiin, thlak an phut thu an sawi.

CISF hnuaiah hian sipai 25,000 vel awmin, ram chhunga airport 98 zinga 60 an veng a ni. Heng sipaite hman tur hian bulletproof jacket 1,000 vel an nei mek a, a thar 1,500 lei belh an duh a ni. Bulletproof jacket an hman mek hi kum 2011-a lei an ni hlawm a, silaia hnai tak atanga kah chuan heng jacket-te hi a kah tlang theih a, a hatu tan pawh a hlauhawm hle niin senior officer chuan a sawi.

Officer chuan ministry of home affairs inkaihhruainaah bulletproof jacket hi kum nga danah thlak zel tur tih a nih thu a sawi. Airport tam zawk chu venhimna uluk taka kalpui ngai an ni tih sawiin, firfiakte beihna a thlen thulhah pawh jacket-te chu an pawimawh dawn hle a ni, a ti.

CISF hian venhim hna an thawhna kawnga an hmanrua mamawh turte report a siam mek a, aviation security atan mi 19,000 an mamawh thu leh, Metro airport-ah mi 4,000 tal mamawh nghal an nih thu a tarlang.