Jharkhand police pathum rukbote chhanchhuak

Jharkhand police pathum, June 26-a Pathalgarhi thlawptuten an rukbo nia sawite chu nimin khan chhanchhuah an ni.

Police pathum–Vinod Kerketta, Sion Surin leh Subodh Kujur te hi Khunti district-a BJP MP Karia Munda chenna-in aṭangin rukbo an ni. Additional Director General of Police RK Malik chuan Pathalgarhi thlawptute chu Lok Sabha chenna-inah hian lutin, police pathumte hi manin an ralthuamte pawh an laksak nghal niin a sawi. He thil thlen lai hian MP hi inah a awm lo a ni.

Khunti district thuneitute chuan Ningani khan heng police pathumte awmna chin hrilh thei hnennah hian lawmman Rs 50,000 pek an tiam a ni. Nimin zing khan police pathum chhanchhuahte hi Saiko Police Station-ah hruai an ni a, an ralthuam ruksak erawh hmuhlet an la ni lo a ni.