Covid variant thar vangin India inralring ; Ram pathum aṭanga lo lutte en uluk turin ngen

Botswana, South Africa leh Hong Kong-a Covid-19 variant B.1.1529 hri kai hmuhchhuah an nih hnuah sorkar laipui chuan heng ram pathum aṭanga India rama rawn lutte chu uluk takin screening leh test neihpui turin state tinte a ngen.

Variant thar hi vawi tam tak inthlak danglam (mutate) tawh niin an sawi a, ram mipuite hriselna thui taka khawih pawi thei a nih thu health ministry chuan an sawi a, a bikin visa pekchhuah kawnga an inthlahdul lai leh ramdang a zinchhuah an tam vanglai tak a nih avangin fimkhur a ngai hle tih a sawi.

Sorkar laipui chuan state leh UT te chu Covid variant thar kai hmuhna ram pathum aṭanga rawn lutte leh an kungkaihte track and test uluk taka kalpui turin a ngen."Heng ram aṭanga zin tur leh an ram kaltlangte bakah variant thar vanga hlauhthawnawm dinhmuna a ding mek ram amite chu health ministry-in inkaihhruaina a lo siam tawh angin screening leh testing uluk tak tak an paltlang tur a ni," tiin health secretary Rajesh Bhushan chuan Ningani khan state tinte hnenah lehkha thawnin a hrilh.

Bhushan chuan khualzin sample endiknaa positive-te chu ministry thuchhuak angin INSACOG genome sequencing laboratory-ah thawn nghal tur a ni tih a sawi nghal bawk.

India ramah Covid-19 kai thar 10,549 awm belh
India ramah Ningani khan Covid-19 hri kai thar 10,549 an awm belh leh a, rampuma hri kai zat chu 3,45,55,431 an awm tawh tih Union health ministry chuan a tarlang.

Darkar 24 chhunga Covid-19 vanga thi 488 awm thar nen hripui thihpui hi 4,67,468 an awm tawh a ni.

Hri kai mek, active case chu sang chho lehin mi 1,10,133 an awm mek a. Hri kai tawh zat aṭangin 1% aiin an tlem a ni.

Ni 49 chhung chu a zawnin nitina coronvirus kai thar mi 20,000 hnuailamah an awm tawh a, ni 152 chhung mi 50,000 hnuailamah an awm tawh bawk.

Ningania hri kai dama puan mi 9,868 awmte nen, ramchhunga recovery rate chu 98.33% a ni mek. Dama puan tawh zawng zawng hi 3,39,77,830 an ni tawh.

Rampumah Covid-19 test vaibelchhe 63.71 kalpui a ni tawh. Nitina hri kai thar zat, daily positivity rate chu 0.89% niin, ni 53 chhung 2% hnuailamah a awm tawh a ni.

Kartina hri kai zat, weekly positivity rate chu ni 12 chhung 1% hnuailamah a awm tawh bawk.