Delhi-UP border-ah loneitute pungkhawm

Sorkar laipuiin farm law pathum a siam duh lohna lantira loneituten Delhi border-a nawrh an huaihawt chu nimin kha a kum khat tlinna a ni a, hemi pual hian hun hrang hrang aṭangin Delhi-UP border-ah hian loneitute an kalkhawm leh.

Loneitute kalkhawm zinga tam tak chuan ei turte kengin, a ṭul dan azirin hun rei zawk awm turin an inpeih tih an sawi.

Prime minister Narendra Modi kaihhruai sorkar laipui chuan loneituten hun rei tak an dodal hnuah farm law pathum a siamtharte chu a sut leh dawn tih a lo sawi tawh a, loneitute pawh an nawrh titawp a, an hnate hlim taka thawk chhunzawm tawh turin PM chuan a lo ngen tawh a ni.

Loneitu pawl hrang hrang intelkhawmna, All India Kishan Sabha chuan sorkarin farm law a sut leh dawn tih sawi mah se, Parliament-ah heng dante hi sut fel a nih hma chuan an nawrh chu titawp an tum lo tih an sawi. Hei bakah hian Parliament Winter Session ṭannia tractor rally neih an tum pawh kaltlangpui an tum thu an lo sawi tawh bawk.

Uttar Pradesh-a Lakhimpur Kheri-a loneitute beih an nih chungchanga inhnamhnawiha puh, union minister of state Ajay Mishra Teni chu minister a nihna aṭanga ban an phut thu All India Kishan Sabha president Ashok Dhawale chuan a sawi. Hei bakah nawrh huaihawt chhunga loneitu thi chhungte hnenah zangnadawmna pe vek turin an phut bawk a ni.

Bharatiya Kisan Union (BKU) hruaitu Rakesh Tikait chuan Parliament session ṭan ni, November 29-ah minimum support price (MSP) guarantee pe tura an phutna lantirin tractor 60 hmangin Parliament panin kawng an zawh dawn tih a sawi bawk.