UNESCO World Heritage Committee-ah India thlang

India chu UNESCO Executive Board-a thlan nawn a nih hnuah, Ningani khan UNESCO World Heritage Committee-ah kum li term atan thlan tlin a ni leh bawk.

Minister of state for external affairs Meenakshi Lekhi chuan a twitter-ah Asia Pacific region aṭangin India chu World Heritage Committee-ah thlan tlin a nih thu sawiin, a tlin theihna atana thlawptu zawng zawngte chungah lawmthu a sawi nghal bawk.

Kum 2021-2025 chhunga World Heritage Committee tur thlannaah India hian vote 142 a hmu a ni. Committee hi World Heritage Convention kalpuina, World Heritage Fund hman dan leh, member ramte hnenah sum lama ṭanpuina pek dan tur chungchang ngaihtuahtu leh mawhphurtu a ni. World Heritage List-a dah tur thlanah pawh thutlukna siamtu a ni.

Kar liam ta khan India hi kum 2021-25 term atan UN cultural organisation Executive Board member thlannaah vote 164 hmuin thlan tlin a lo ni tawh bawk. UNESCO Executive Board hi UN agency-a consitutional organ pathum zinga pakhat a ni a, General Conference hnuaiah awmin Board hian organisation hnathawh tur te, Director-General in budget estimate a siamte a endik ṭhin. Board-ah hian member ram 58 an awm.