Covid-19 kai Enkawl dam 50% aiin tam tawh

Sorkar laipui chuan nimina report a tih chhuahah Covid-19 kai enkawl dam rate chu  50.59% a tling tawh tih an tarlang a, enkawl dam 1,62,379 an awm tawh. 

Health and Family Welfare Ministry report aṭanga a lan dan chuan report an tihchhuah hma darkar 24 chhungin mi 8,049 an enkawl dam hman a ni.

Enkawl dam rate hi pung zel mah se hri leng hian ziaawm lam a la pan thei chuang lo a, nimin khan hri kai hmuh chhuah tam ber ni kan tawng leh a, ram pumah hmuh chhuah thar 11,929 an awm.

India ramah hian hri kai 3,20,922 awm tling tawhin enkawl dam 1,62,379 an awm a, hri la kai mek 1,49,348 an awm bawk a ni.

Thihpui zat pawh an pung zel a, mi 311-in thihpui lehin hri len ṭan tirh aṭang khan mi 9,195-in an thihpui tawh. Thihpui zat hi 2.86% an ni tawh bawk.

Ram chhunga hri kai hmuh chhuah tawh zinga 63% chu khawpui  15-a mi an ni a, heng khawpuiah hian ni 10 liam ta chhung khan hri kai hmuh chhuah hi 40-50% velin an pung a ni. 

Khawpui zingah hian Gurugram, Faridabad, Vadodara, Solapur leh Guwahati-te pawh an tel. 

India rama hri kai tamna ber, Maharashtra-a hri kai zinga 54.73% chu an state khawpui Mumbai-a mi an ni. 

Tamil Nadu-a hri kai 70% chu Chennai mi an ni a, Gujarat-ah pawh hri kai hmuh tawh zinga 70.86% chu Ahmedabad khawpuia cheng an ni bawk. 

Indian Council of Medical Research (ICMR) chuan ni khatah sample 1,51,432 an test tling tawh tih an tarlang a, ram puma laboratory hrang hrang aṭangin sample 56,58,614 an test tawh a ni.

Nimin thleng khan Covid-19 test-na tura a pawmpui labo­ratory 893 a awm tawh a, sorkar laboratory 646 leh private laboratory 247 a awm.