Sorkar laipuiin GST Day a hmang

Central-a BJP kaihhruai National Democratic Alliance (NDA) sorkar chuan ram puma chhiah inang tlang lakna tur, Goods and Services Tax (GST) hman a nih kum khat tlinna champha, 'GST Day' chu nimin khan a hmang.

Kum 2017 June 30 zanlai khan Prme Minister Narendra Modi leh hetih laia President Pranab Mukherjee te chuan tax scheme thar, ram puma chhiah inang tlanga lakna tur, 'One Nation–One Tax -One Market' siamna tur hi an tlangzarh a, July 1 aṭangin hman ṭan nghal a ni.

PM Modi chuan GST chuan thil siamchhuah thlengin a tihpun phah a, sumdawnna lam awlsam zawka kalpui theihna tur siamin, hei hi a sumdawng tenau zawkten a bikin an chhawr hle a ni, a ti. Union Finance Minister Arun Jaitley-a pawhin kum 2017, July 1-a India rama GST hman ṭan a ni chu thil hriatreng tlak a nih thu sawiin, kum khat kalpui a nih chhung hian hlawkna tam tak a awm tawh a ni, a ti. India ram mipui, state sorkar leh official-te duhsakna a hlan nghal bawk.

Union Minister Piyush Gopal pawhin GST chu hun rei zawk thlira ram economy ṭhatna tur a ni tih sawiin, GST kalpuina a nih theihna kawnga thawhpuitui political party hrang hrang leh an hruaitute chungah lawmthu a sawi. GST hmang hian chhiah lak dan pawh langtlang zawka kalpui theih a nih phah a ni, a ti.

Hetih lai hian eptu party, Congress chuan GST kalpui dan chu mumal lo leh hlauhawm tak niin a sawi thung a, ram puma chhiah inang tlang lakna tur 'single tax GST' chu a taka tihpuitlin a la ni lo a, suangtuahnaah chauh ala awm a ni, a ti. Congress chuan chhiah pek dan chi hrang hrang, rules tam tak leh chhiah lakna chi tam tak siam chu sumdawngte tan mumang hrehawm tak ang maiin harsatna a thlen zawk a ni, tiin a sawi.