Delhi-a chhungkaw member 11-te thia hmuh an ni

Delhi hmar lam, Burari bialah nimin zing khan Bhatia chhungkaw member 11-te chu an chenna inah thia hmuh an ni.

Police-te chuan ruang an hmuh zinga 10-te chu ceiling-ah khai an ni tih sawiin, pitar pakhat ruang chu chhuatah hmuh a ni tih an sawi. An ruang hmuh zinga a tam zawk hi an mit tuamsak an nih bakah, an hnung lamah an kut phuarsak an ni bawk.

Chief Minister Arvind Kerjiwal-a chuan he thil thlenna hmun hi a tlawh nghal a, police-te hnenah thil awmdan chhui chiang tura a hriattir nghal thu a sawi. Delhi BJP hotu Manoj Tiwari pawhin Burari hi a tlawh tawh bawk a ni.

Police-te chuan Bhatia chhungkuate hi mahni intihlum nia an ngaih thu an sawi a, ruang an hmuh zinga pasarih chu hmeichhia an ni a, tleirawl pahnih an tel bawk. An chhungkua hian an in bul lawkah hian dawr an neih bakah, plywood lam sumdawnna an nei bawk. He hmunah hian kum sawmhnih chuang an cheng tawh a ni.