BSP hotuin Prime Minister leh BJP sawisel

Bahujan Samaj Party (BSP) hotu Mayawati-i chuan Prime Minister Narendra Modi chu ram pawn lama sum chheprelh lakkir vek a lo tiam tawh hlen zo loah puhin, PM kaihhruai BJP chu eiru nasaah a puh bawk.

BSP hotu chuan BJP chu hun reilote chhungin ramchhunga political party hausa ber a ni thei tih sawiin, sum chheprelh chungchanga PM a ngawih reng chhan a zawt. Mayawati-i chuan rampawn lama sum chheprelthu tam zawk chu BJP nena inhnimhnai tak tak an ni, a ti.

Mayawati-i chuan, "Ram mipuite chuan ram pawn lama sum chheprelh chungchana sorkar laipui leh PM a ngawih rengna chhan hi an hre duh a ni. Sum chheprelhtute hi BJP nena inhnimhnai tak an vang em ni? Hei vang hian BJP pawh hi hun reilote chhungin India rama party hausa ber a ni chho thei a ni", a ti.

Sum tam tak tihchingpentua puh Vijay Mallya leh Nirav Modi-te chungchang pawh sawichhuakin, Mayawati-i chuan sumdawngte chuan an sumdawnna tihlenna atan Indian bank-te an hmang a, mahse heng bank-te hi bumin an tlanchhiat san a, ram pawn lamah an sumte chu a dah leh zawk ṭhin niin a sawi. Hetihlai Narendra Modi kaihhruai sorkarin heng mite lo dang tura engmah a ti thei lo chu mipuite chuan an hrethiam lo hle niin a sawi bawk.