Delhi-a nursing home-te hri kai enkawlna atan hmang dawn

Delhi-ah hri kai an pun chak avangin, sorkar chuan khawpui chhunga nursing home, khum 10-49 nei chinte chu hri kaite enkawlna tur, 'Covid nursing home' atan hman vek an ni dawn tih a sawi. 

Hemi chungchang hriattina hi AAP sorkar chuan Inrinni zan khan pass-in a tichhuak nghal a ni. Nursing home-te hnenah hian an home-a khumte chu Covid-19 kaite awmna tur atan ni thum chhunga lo peihfel hman turin a hriattir bawk. Sorkar chuan he ruahmanna hi multispeciality nursing home-a hri kai leh kai lote inawmpawlh tur venna atana tih a nih thu a sawi. 

Delhi-ah hian Covid-19 hri kai hi an pung zel a, nimin thleng khan hri kai hi mi 38,958 an awm tawh a ni. Hri kai pun zel avang hian hri kaite mutna turah indaihlohna a awm chho ṭan zel a, hei vang hian Delhi sorkar chuan an mutna tur atan nursing home-a khum 10-49 nei pha chinte hnenah hriattirna hi a pe chhuak ta a ni. 

Union Home Minister Amit Shah chuan nimin khan Delhi-a Covid-19 hri kaite enkawlna tur atan rel pindan 500 chu sorkar laipuiin Delhi sorkar hman tir a phal thu a sawi.

Amit Shah, Union Health Minister Harsh Vardhan, Delhi Lieutenant Governor Anil Baijal leh Delhi chief minister Arvind Kejriwal-te chuan nimin khan meeting neiin,  hri leng chungchang an sawiho a ni. Meeting zawh  hnuah Amit Shah chuan Covid-19 leng mek dona kawngah sorkar laipui leh Delhi sorkar chu an thawhdun zel tur thu sawiin, Delhi-ah hri kai an pun belh zel avangin hri kai enkawl ngaite awmna turin rel pindan 500 hman tir a ni dawn tih a sawi a ni.